文: Jonathan

(我們「學士無雙」,由來自不同學科背景的作者輪流執筆,跟大家分享各學科的奇聞趣事、辛酸秘史。)

DSE已經放榜,相信莘莘學子對於自己入唔入到U已經心中有數。報紙每年都有報,邊個星星狀元揀邊科「神科」,背後有乜理念。咁普通人應該點揀呢?邊間U邊科好?乜乜科前景如何?呢啲問題相信喺各大討論區已經討論得如火如荼。云云標題之中,最吸引我嘅就係「千祈唔好讀Science」。冇錯,小弟就係6901,HKU SCIENCE嘅學生。

呢類post其實有血有淚 ──你冇讀過又點講到個辛酸。最多人講嘅係,讀Science係「嘥銀紙」,畢左業之後唔繼續讀上去,冇咩工可以做,搵到工都係做lab或者sales,人工比其他學院嘅低一截。

現實係點嘅呢? 根據CEDARS (即香港大學負責協助畢業生就業的中心) 嘅資料,二零一一年的理學院(只限BSc)畢業生,七成六獲聘,兩成三進修。薪金平均數係$12,841,對比全港大平均數$17650,明顯少一截。參考CEDARS嘅圖表,亦顯示理學院畢業生嘅平均薪金係全部學院之中最低嘅,但工種其實都幾廣泛,基本上各行各業都有。

(編按:二零一四年理學院BSc畢業生的數據為七成九獲聘,兩成一進修。薪金平均數$15,098,對比全港大平均數$20,291。)

就咁睇,讀Science好似真係討論啲人咁講,冇乜「錢途」,咁點解仲有人會揀呢?揀Science嘅其實可以分成三類人。一、熱愛科學,目的係做研究;二、想讀Risk Management,晉身金融界;三、「我個分夠入6901咋,讀住先啦,出黎做乜都同個學位都冇乜關係架啦」。第一類人好清楚自己目標,大部份真係會繼續讀MPhil然後PhD,小部份會驚覺興趣冇想像中咁大,然後就去搵工。第二類,亦都係佔左大多數嘅一群,同第一類人一樣,一係如願以償,一係就:「我見人揀我先揀咋」,結果就完全唔知自己做緊乜。最後一類,都佔左唔少嘅,佢地將會喺大學入面搵到想做嘅野,又或者,搵唔到。

小弟曾經以為自己想做研究,一直都係讀理科,點知喺大學一直都讀唔掂,對住啲factual野,背晒然後去考試,我真係好唔鍾意個形式。後來讀左某啲文科科目,寫吓文上吓tutorial,感覺幾好,然後發現個分仲高,就知道可能揀錯科。

我唔會叫人唔好揀Science,6901的確幾好,除左你要砌到個學分夠至少一個主修同埋一堆通識、語文外,其他學分係任你砌,可以畀你發掘下自己興趣。如果真係發覺唔啱讀,其實係可以申請轉科,不過要由第一年讀過。

結論就係﹐讀乜都好,記住喺大學入面搵到真正想做嘅野,可能你會覺得讀Science真係「嘥銀紙」,但係可能係因為咁而令你搵到你嘅目標,咁都不失為一件好事。