文:香港民主宣傳小組

「除左佔領,仲可以做D咩?」因為呢個問題,幾個人聚集埋一齊,成立左「香港民主宣傳小組」。我地既工作,係每個禮拜日走上街頭,透過派傳單、做問卷,同民眾傾下計,問下佢地對民主、對佔領運動既想法,解釋番政府831「袋住先」方案、功能組別係D咩。

基於同一個理念,我地聚集左越黎越多人(而家有四十個),大部分幫手落區,有D負責寫作、設計、宣傳等等。我地去過將軍澳、九龍灣,下一站係坑口。

同人傾計,永遠唔係一件容易既事。一方面要明白佢地既想法,一方面亦都要將我地既信息講出去。但係落區又係一件刺激既事—我地試過比人挑機,試過遇到極品藍絲,甚至試過比人指住面鬧(好在唔多)。不過最終,落區又係一件好令人滿足既事。當有人攞住兩大袋餸都特登走過黎鼓勵我地,當有人喺我地解說下終於明白「袋住先」方案既不足,當有人由保持中立轉而支持學生,我地所有既疲倦都會一掃而空。

咁喺過往既落區行動中,我地見過D咩人?以下同大家分享幾個典型既個案:

  1. 小迷糊

「婆婆,你有無聽過袋住先方案?」

「阿婆幾十歲唔識呢D野……」

小迷糊自稱乜都唔識,亦都唔想了解政治。最大問題係,政治唔會因為我地唔理而離開—小至領匯加租、最低工資,大至特首人選、興建高鐵,全部都關我地事。唔理政治,只會白白將我地應有既權利送比人,任人宰割。

  1. 小博士

「先生,請問你支唔支持民主?」
「你知唔知希特勒都係民選出黎?」
「你知唔知蘇聯點解解體?正正係美國的主意,要透過第三者令佢分裂!」
「你知唔知香港有普選之後,會帶黎咩後果? 西藏、蒙古都會搞獨立!」

同小迷糊相反,小博士知道以上每一個問題既答案,所以佢唔相信民主。咁佢信咩?中國共產黨。雖然街頭上唔多小博士,但都會有好多類似既好有主見既人。同佢地傾計,唔單止要有學識(例如答到佢蘇聯解體唔單止因為外國勢力),仲要有無比耐性。

  1. 小人質

「小姐,請問你對佔領運動有咩睇法?」

「好心你地班學生就唔好搞咁多野,你地鬥唔過大陸架,而家香港咪幾好……」

「你地要幫梁振英諗下,其實佢已經好辛苦……」

「政府施政無十全十美,無得話滿足所有人……」

小人質大多數都好體貼,好鐘意由政府既角度出發,雖然佢並無能力選出呢個政府。佢地就好似患左斯德哥爾摩症候群既人質咁,面對無法同綁匪抗衡既無力感,開始對綁匪表示同情—「其實綁匪都幾好吖,無撕票」「其實綁匪都係迫不得已既者,佢地已經好辛苦……」

hkgdp2除左小迷糊、小博士同埋小人質,街上面仲有好多唔同種類既人。如果你有興趣知道更多,或者有興趣加入我地,一齊走上街頭,讓民主遍地開花,歡迎登入 https://www.facebook.com/hkgdp 了解更多。

作者簡介:香港民主宣傳小組(香港民宣)- 民間自發小組,立足社區,通過對話求共識,增了解,化分歧;宣揚民主意識,建構公民社會。歡迎同路人加入:http://goo.gl/forms/jUMu3XS5WE